"Virusdan qorunmanın yeganə yolu vaksinasiya prosesidir"

Əsrlər boyu bəşəriyyət müxtəlif yolxucu xəstəliklərlə mübarizə aparıb. 21-ci əsrin bəlası adlandırılan COVİD-19 pandemiyası ilə mübarizəni dünya səhiyyəsi hələ də davam etdirir. Ölkəmizdə də bu virusa qarşı qabaqlayıcı tədbirlər görülür. Bu tədbirlərdən biri də insanların vaksinasiya olunmasıdır. Ötən əsrdə peyvəndlər on milyonlarla insanı ölümdən xilas edib, amma bu gün dünyanın bir çox ölkələrində, eləcə də Azərbaycanda mütəxəssislər vaksinasiyadan imtina tendensiyası müşahidə edirlər.

AztürkmanTv-nin vaksinasiya ilə bağlı suallarını Xocalı rayon Məkəzi Xəstəxanası PHŞ direktoru Aqil Məmmədov cavablayıb.
Aqil bəy xəstəliyin hazırki vəziyyətindən danışdı:

“Prezident İlham Əliyevin hələ 2020-ci il tapşırığına əsasən pendemiyanın qarşısının alınması məqsədilə tədbirlər görüldü. Eyni zamanda modul tipli xəstəxanaların tikilməsi tapşırığı verildi və qısa zaman ərzində həmin modul tipli xəstəxanalar istifadəyə verildi. Burada çarpayı sayının artırılması, gələcəkdə yaranacaq problemlərin qarşısını almaq üçün tibb işçilərinə habelə səhiyyəmizə çox böyük kömək etdi. Son ildə pandemiyanın müxtəlif dalğalarının yayılması, yoluxma sayının da artmasına səbəb olub. Bu da ölkə səhiyyəsində xeyli çətinliklər yaradır. İlk növbədə bizim əsas məqsədimiz bu xəstəliyin qarşısının alınması və ondan qorunmaqdır.”

Yoluxma sayının azalması, virusun bitməsinin yeganə çıxış yolu vaksinasiyadır. Bəs ölkəmizdə vaksinasiya prosesi necə davam etdirilir?

“Cari ilin yanvar ayının 19-dan Azərbaycan Respublikası Prezidenti İlham Əliyevin tapşırığına uyğun olaraq ölkə ərazisində vaksinasiya prosesinə başlanıb. Vaksinasiya prosesində bu günə qədər əhali arasında 1-ci doza vaksinasiya, 2-ci doza vaksinasiya və hətta 3-cü doza vurulması həyata keçirilir. Dünyada olduğu kimi ölkəmizdə də vaksinasiya prosesi çox uğurla davam etdirilir. Proses başlayandan ölkə ərazisində yoluxma sayı azalıb. Beləliklə vaksindən sonra virusa yoluxanlar, xəstəliyi yüngül formada keçirməsi bizim vaksin olunmağımıza ən gözəl şərait yaradır. Bəzi dövlətlərin bu vaksini almağa maddi imkanı çatmır və onlar çox böyük problemlər yaşayırlar. Ancaq sevindirici haldır ki, bizim ölkəmizdə yetəri qədər vaksin var. Hazırda ölkəyə 16 milyon 200 mindən çox vaksin gətirilmişdir ki, buda ölkə əhalisinin nəinki 2 dəfə, ehtiyac olduqda əlavə vaksin olunması deməkdir.”

Təssüf ki, insanlar arasında vaksinasiyaya qarşı mənfi fikirlər dolaşır. Buna qarşı mübarizə aparılsa da öz nəticəsini vermir. Hələ də vaksindən imtina edənlər vardır.

“İnsanlar başa düşməlidirlər ki, virusdan qorunmanın yeganə yolu vaksinasiya prosesidir. Sosial şəbəkələrdə yayılmış məlumatlar heç də həqiqəti göstərmir. Dövlətin vəzifələrindən biri xalqının sağlamlığıdır. Dövlətimiz, hökumət müxtəlif yollarla peyvəndi ölkəyə gətirir ki, xalqımız sağlam olsun, bəşəriyyətin bu bəlasını rahat adlaya bilsin. İnsanları kütləvi şəkildə vaksinasiyaya dəvət edirəm. Hər kəs vətəndaş, valideyn, övlad məsuliyyətini hiss edib özünü və ətrafındakıları qorumaq üçün peyvənd olunsun.”

Sənan İmanov,

Ləman Kərimova.

Tarix: 3-09-2021, 11:11