"Düşmənin SU-25 tipli döyüş təyyarəsini onların öz silahı ilə məhv etdim"

Bir zamanlar həsrəti ilə yaşadığımız Qarabağ artıq düşmən tapdağından azad olunub. 1990-cı illərdə məcburi köçkün kimi analarının, babalarının qucağında doğma yurdu tərk edən qoçaq igidlərimiz II Qarabağ müharibəsində tank üstündə Qarabağı Azərbaycana qaytardı. Müharibə zamanı ön xətdə düşmənə qarşı mübarizə aparan cəsur igidlərimizdən biri də Hüseynzadə Elvin Əlikram oğludur. Gəlin Elvini yaxından tanıyaq:
Hüseynzadə Elvin Əlikram oğlu 18 sentyabr 1999-cu ildə Göygöl rayonunun Pənahlılar kəndində anadan olub. Orta məktəbi bitirdikdən sonra 2015-ci ildə Gəncə musiqi kollecinə daxil olub. O təhsilini başa burduqdan sonra 2019-cu ilin iyulun 4-ü N saylı hərbi hissədə xidməti vəzifəsini yetirməyə başlayıb. O, Zenit raket Divizyonunda xidmət edib. Füzuli, Qubadlı, Laçın və Cəbrayıl uğrunda gedən döyüşlərdə iştirak edib.
Əziz oxucular, Sizə Hüseynzadə Elvin Əlikram oğlu ilə müsahibəmizi qısa şəkildə təqdim edirik:
Elvin bəy, Qarabağın azad olunmasında iştirakınızı nə vaxtsa düşünmüsünüzmü, bu haqda nə deyə bilərsiniz?
Vətən bizim üçün hər şey deməkdir. Qarabağsız Vətənimiz isə yarımçıq idi. Bu torpaqların işğaldan azad edilməsində düşünürəm ki, hər bir Azərbaycan vətəndaşı iştirak etmək istəyər. Uşaqikən Qarabağ torpaqlarında bizə qarşı ermənilərin törətdiyi soyqırımı oxuduqca, canlı şahidlərdən müsahibələri dinlədikcə dəhşətə gəlirdim. Bir gün ermənilərdən qısasımızı alacağımıza inanırdım. 2016-cı il aprel döyüşləri zamanı uğurumuz bütün xalqımızı həvəsləndirmişdi. Hər kəs Ali Baş Komandanın əmrini gözləyirdi. Nəhayət, 27 sentyabr ermənilərim hücumlarına qarşı əks hücum əmri verildi. Artıq arzularım gerçəkləşirdi. Ermənilərdən qisas almaq vaxtı çatmışdı. Bizi ön cəbhəyə yola saldılar.
İştirakı olduğunuz döyüşləri necə xatırlayırsız?
Əks hücum əmri verildikdən sonra Füzuli rayonu uğrunda gedən döyüşlərə yollandıq. Mən Füzuli, Cəbrayıl, Qubadlı və Laçın rayonu uğrunda gedən döyüşlərdə iştirak etdim. Şəhidlərimiz, yaralılarımız olduqca daha da nifrətim artırdı.Hər çətinliyi və rahatlığı yoldaşlarımla birlikdə yaşayırdım. Eyni məktəbdə təhsil aldığım dostumun şəhid olmasını eşitdim. İllərin dostu olan yaxınımı itirmək mənə çox pis təsir etdi, nifrətim, qəzəbim daha da şiddətləndi. Mənfur düşmənə sarsıdıcı bir zərbə vurmaq istəyirdim.

Siz II Qarabağ müharibəsində xüsusi fəallıqla yadda qalmısız. Düşmənin SU-25 tipli döyüş təyyarəsini onların öz silahı ilə məhv etmisiz. Bu zaman keçirdiyiniz hislər haqqında nə deyə bilərsiniz?
Müharibənin qızğın vaxtları idi. Oktyabrın 29-da Qubadlının Xəndəy kəndi ətrafında şiddətli döyüşlər gedirdi. Biz irəlilədikcə ermənilər öz silahlarını atıb qaçırdı. Bu zaman onlara məxsus raketi götürərək SU-25 tipli döyüş təyarrəsini nişan aldım. Təyyarənin partlayışından həyəcanlanmışdım. Ağlıma gəlməzdi ki, belə bir qəhrəmanlıq edərəm. Az da olsa şəhidlərimizin qisasını ala bildim.
Müharibədən sonra dövlətin qayğısını, qayğıkeş münasibətini hiss etdinizmi? Bununla razısınızmı?
Müharibədən sonra Cənab Prezident İlham Əliyevin sərəncamı ilə “Vətən uğrunda” medalı ilə təltif edildim. Döyüşlərdə iştirak edən hər kəsə dövlət qayğısı göz qabağındadır. Dövlət şəhid ailələrinin və qazilərin sosial həyatının yaxşılaşdırılması, onların medal və ordenlərlə təltif edilməsi, adlarının tarixdə yaşaması üçün hər bir addımı atır. Lakin ac məmurlar dövlətin bu istiqamətdə atılan addımlarından da “pul çıxarmağa” çalışır. Döyüşlərdə qəhrəmanlıq göstərən qazilərimizin bir çoxu, eləcə də mən iştirak etdiyim döyüşlərin təltifnaməsi olduğu halda sərəncamda adımız çıxmayıbdır. Müəyyən söhbətlər dolaşır ki, şəhid ailələrinə və qazilərə verilən müavinətdə korrupsiya vardır. Fürsətdən istifadə edim müvafiq orqanlara müraciət etmək istəyirəm ki, sadaladığım problemlərlə bağlı müəyyən ölçü götürsünlər.

Sənan İman

Tarix: 13-07-2021, 20:24